Kuri uyu wa Gatanu tariki ya 04 Werurwe 2022 ni bwo muri IPRC Huye hasojwe Icyumweru cy’Intore mu zindi. Umuyobozi wa IPRC Huye, akaba n’Umutoza Mukuru, Lt. Col. Dr. TWABAGIRA Barnabe yasabye intagamburuzwa  kurangwa no guhanga udushya.

Mu gusoza iki cyumweru cy’intore mu zindi, Imparanirakurusha za IPRC Huye zabanje gutera ibiti by’inturusu bigera ku bihumbi bitanu, ku buso bwa hegitari eshanu. Umuyobozi wa IPRC Huye avuga ko ibi biti bitewe mu rwego rwo gutanga umusanzu wo kubungabunga ibidukikije.

Intagamburuzwa za IPRC Huye zahigiye imbere y’Umutoza Mukuru kuzakora ibikorwa binyuranye birimo: kwita ku masomo yabo, guhanga ibishya, gukora ibiteza imbere ikigo, akarere ka Huye n’igihugu muri rusange, kurangwa n’imyitwarire iboneye no gukoresha neza imbuga nkoranyambaga.  

Biteganyijwe ko muri uyu mwaka w’amashuri wa 2021-2022, intore nshya za IPRC Huye zizaba ari 589, zirimo ab’igitsina gore 129 n’igitsina gabo 460. Abitabiriye icyumweru cy’intore mu zindi bashyizwe mu masibo atanu: GUKUNDA IGIHUGU, UBUTWARI, GUKUNDA UMURIMO, UBUNYANGAMUGAYO, UBUMWE, UBWITANGE n’UBUNYARWANDA.

Umushyitsi Mukuru mu muhango wo gusoza Icyumweru cy’intore mu zindi yari Lt. Col. Dr. TWABAGIRA Barnabe, Umuyobozi wa IPRC Huye. Uyu muhango witabiriwe kandi n’abakozi n’abanyeshuri.

Claude NIZEYIMANA

Public Relations and Communication Officer

IPRC Huye.